मनिला (फिलिपिन्स)। फिलिपिन्समा हिरासतमा लिइएका ६४ जना चिनियाँ नागरिक बिहीबार रिहा भएका छन्। मनिलास्थित चिनियाँ दूतावासले एक विज्ञप्ति जारी गर्दै हिरासतमा रहेका अन्य ६ जना चिनियाँ नागरिकको पनि रिहाइ प्रक्रिया चलिरहेको र उनीहरू छिट्टै मुक्त हुने जानकारी दिएको छ। यी चिनियाँ नागरिकहरूलाई गत मे १५ मा दक्षिणी फिलिपिन्सको मिसामिस ओरिएन्टल प्रान्तमा अवस्थित एक स्टिल प्लान्टमा काम गरिरहेको अवस्थामा फिलिपिन्सका सुरक्षा तथा कानुनी अधिकारीहरूले नियन्त्रणमा लिएका थिए। उनीहरूमाथि फिलिपिन्सको आणविक सुरक्षा ऐन, अध्यागमन ऐन र श्रम संहिता उल्लङ्घन गरेको आरोप लगाइएको भए पनि स्थानीय अदालतले ती आरोपहरू प्रमाणित गर्ने ठोस र पर्याप्त प्रमाण नभेटिएको भन्दै रिहा गर्न आदेश दिएको हो
चिनियाँ दूतावासले यस घटनालाई उच्च प्राथमिकतामा राख्दै फिलिपिन्सका सम्बन्धित अधिकारीहरूसँग निष्पक्ष र द्रुत कानुनी समाधानका लागि निरन्तर कूटनीतिक पहल गरेको जनाएको छ। दूतावासले आफ्ना नागरिकहरूको मानव अधिकार र कानुनी रक्षाको माग गर्दै फिलिपिन्समा रहेका चिनियाँ नागरिक तथा संस्थाहरूको सुरक्षाका लागि आफ्नो प्रतिबद्धता समेत दोहोर्याएको छ। साथै, दूतावासले फिलिपिन्समा कार्यरत वा बसोबास गरिरहेका आफ्ना सबै नागरिक र सम्बद्ध निकायहरूलाई स्थानीय कानुन तथा नियमहरूको कडाईका साथ पालना गर्न सुझाव दिएको छ।
