जेरुसेलम। इजरायलका रक्षामन्त्री इजरायल काट्जले लेबनान, सिरिया र गाजाका विभिन्न भागमा स्थापना गरिएका ‘सुरक्षा क्षेत्र’ (Security Zones) बाट तत्काल सेना फिर्ता नहुने स्पष्ट पारेका छन्। सन् २००६ को युद्धमा मारिएका सैनिकहरूको सम्मानमा आयोजित एक कार्यक्रममा बोल्दै उनले ती क्षेत्रहरूबाट सेना फिर्ता हुने कुनै समयसीमा नभएको बताएका हुन्।
रक्षामन्त्री काट्जका अनुसार स्थानीय बासिन्दाहरूलाई जिहादी समूहहरूको प्रभावबाट जोगाउन भन्दै इजरायली रक्षा बल (IDF) ती क्षेत्रमा अनिश्चितकालसम्म तैनाथ रहनेछ। उनले चेतावनी दिँदै लेबनानमा जारी इजरायली कारबाहीलाई आधार बनाएर यदि इजरायलमाथि कुनै आक्रमण भएमा इरानविरुद्ध ‘पूर्ण बल’ प्रयोग गरिने जनाएका छन्।
यद्यपि, शुक्रबार इजरायल र लेबनानबीच अमेरिकाको मध्यस्थतामा एक सम्झौतापत्रमा हस्ताक्षर भएको छ। यसका बाबजुद प्रधानमन्त्री बेन्जामिन नेतान्याहुसहित इजरायली उच्च अधिकारीहरूले दक्षिणी लेबनानबाट सेना फिर्ता लिन पटक-पटक अस्वीकार गर्दै आएका छन्। इजरायलको स्पष्ट अडान छ कि हेजबुल्लाह लडाकुहरूलाई निशस्त्रीकरण नगरुन्जेल सेना फिर्ता हुने छैन।
गत मार्च महिनाको सुरुमा हेजबुल्लाहले इजरायललाई लक्षित गरी रकेट प्रहार गरेपछि क्षेत्रीय द्वन्द्व चर्किएको थियो। इरानका सर्वोच्च नेताको मृत्युको बदलास्वरूप गरिएको भनिएको उक्त आक्रमणपछि इजरायलले लेबनानमाथि व्यापक हवाई तथा स्थलगत कारबाही सुरु गरेको हो।
लेबनानको स्वास्थ्य मन्त्रालयका अनुसार युद्ध सुरु भएयता इजरायली आक्रमणमा परी हालसम्म करिब ४,३०० जनाले ज्यान गुमाएका छन्। अर्कोतर्फ, इजरायली सेनाले सोही अवधिमा लेबनानमा आफ्ना ३८ जना सैनिक र एक नागरिकले ज्यान गुमाएको विवरण सार्वजनिक गरेको छ।
यसैबीच, गाजा क्षेत्रमा इजरायली सेनाले करिब ७० प्रतिशत भूभाग आफ्नो नियन्त्रणमा लिएको छ। अक्टोबर महिनामा लागू भएको युद्धविरामको पालनालाई लिएर हमास र इजरायली सेना दुवैले एक-अर्कालाई सम्झौता उल्लंघनको आरोप लगाउँदै आएका छन्।
