काठमाडौँ । प्रमुख प्रतिपक्षी दल नेपाली काँग्रेसले संघीय संसदमा देखिएको असामान्य राजनीतिक घटनाक्रमबारे सरकारसँग औपचारिक स्पष्टता माग गरेको छ।
मंगलबार बसेको प्रतिनिधि सभा बैठकमा काँग्रेसका तर्फबाट सांसद वासना थापाले प्रधानमन्त्री वालेन्द्र शाह (बालेन)को भूमिकामाथि प्रश्न उठाउँदै सरकारको जवाफ आवश्यक रहेको बताइन्।
उनले राष्ट्रपतिद्वारा सरकारको नीति तथा कार्यक्रम प्रस्तुत भइरहेका बेला प्रधानमन्त्रीले संसद् बैठक छाडेर बाहिरिएको घटना लोकतान्त्रिक अभ्यासको दृष्टिले गम्भीर भएको टिप्पणी गरिन्।
थापाका अनुसार संसदीय इतिहासमै यस्ता दृश्य दुर्लभ हुने भएकाले यो सामान्य घटनाका रूपमा लिन नहुने उनको धारणा थियो।
उनले संवैधानिक मर्यादा, संसदीय परम्परा, राज्यप्रतिको उत्तरदायित्व र सरकारको जिम्मेवारीबोधजस्ता पक्षमा प्रश्न उठेको उल्लेख गर्दै यसबारे स्पष्ट धारणा सार्वजनिक गर्न सरकारलाई आग्रह गरिन्।
काँग्रेस सांसद थापाले यस्ता घटना दोहोरिन नदिन आवश्यक सचेतना अपनाउनुपर्ने बताउँदै लोकतन्त्रमा पदभन्दा मर्यादा र मर्यादाभन्दा जनविश्वास बढी महत्वपूर्ण हुने धारणा राखिन्।
अन्त्यमा उनले प्रमुख प्रतिपक्षी दलको तर्फबाट प्रधानमन्त्रीसँग औपचारिक जवाफ माग गरिएको जानकारी दिइन्।
