वासिङ्टन । अमेरिकी राष्ट्रपति डोनाल्ड ट्रम्प प्रशासनले इरानसँगको तनाव र मध्यपूर्वको सुरक्षालाई लिएर परस्पर विरोधी अभिव्यक्ति दिँदा अन्योल बढेको छ। एकातिर प्रशासनका उच्च अधिकारीहरूले अस्थायी युद्धविराम र रक्षात्मक सैन्य गतिविधिको दाबी गरेका छन् भने अर्कोतर्फ आवश्यक परे पुनः सैन्य कारबाही सुरु गर्ने चेतावनी दिएका छन्।
अमेरिकी रक्षामन्त्री पिट हेगसेथले होर्मुज जलमार्गमा जहाजहरूको सुरक्षित आवागमनका लागि अमेरिकी सेनाले सहयोग गरिरहेको बताए। उनले यो कदम पूर्णतया रक्षात्मक रहेको र हाल युद्धविरामको अवस्था रहेको दाबी गरे। यसैगरी, विदेशमन्त्री मार्को रुबियोले सैन्य अभियानले आफ्नो लक्ष्य हासिल गरेको भन्दै त्यसलाई अन्त्य गरिएको जानकारी दिए। क्षेत्रीय शान्ति स्थापना र होर्मुज जलमार्ग सञ्चालनका लागि इरानसँग सम्झौता हुनुपर्नेमा रुबियोले जोड दिए।
तर, मन्त्रीहरूको शान्तिपूर्ण दाबी विपरीत इरान र अमेरिकी सेनाबीच क्षेप्यास्त्र तथा ड्रोन आक्रमणका विवरणहरू पनि बाहिर आएका छन्, जसले तनाव अझै अन्त्य नभएको प्रष्ट पार्छ। त्यस्तै, राष्ट्रपति ट्रम्पले होर्मुज जलमार्गमा सुरक्षा सुनिश्चित गर्ने प्रयासलाई तत्कालका लागि रोकिएको बताएका छन्। इरानसँग सम्झौताको सम्भावना मूल्याङ्कन गर्न यस्तो निर्णय लिइएको ट्रम्पको भनाइ छ।
यद्यपि, बुधबार बिहान ट्रम्पले इरानले अमेरिकी सर्त नमानेमा फेरि सैन्य कारबाही थाल्ने चेतावनी दिएका छन्। उच्च अधिकारीहरू र स्वयं राष्ट्रपतिका यस्ता फरक-फरक भनाइले युद्धविरामको वास्तविक अवस्था र अमेरिकी रणनीतिका विषयमा अस्पष्टता बढाएको छ।
विश्वको प्रमुख तेल ढुवानी मार्गको रूपमा रहेको होर्मुज जलमार्गको सुरक्षा र स्थिरताले अन्तर्राष्ट्रिय ऊर्जा बजारमा प्रत्यक्ष प्रभाव पार्ने भएकाले यस क्षेत्रको पछिल्लो अवस्थालाई विश्वभर निकै चासोका साथ हेरिएको छ।
