वासिङ्टन। अमेरिका र साउदी अरेबियाका वायुसेनाले इराकस्थित इरान समर्थित सशस्त्र समूहहरूलाई लक्षित गरी संयुक्त हवाई आक्रमण गरेका छन्। हालै भएका आक्रमणहरूको जवाफमा इराकको पूर्वी क्षेत्रमा रहेका लजिस्टिक्स तथा हातहतियार भण्डारण केन्द्रहरूमा प्रहार गरिएको अमेरिकी र साउदी रक्षा मन्त्रालयले जनाएका छन्।
इरान र अमेरिकाबीच केही दिन रोकिएको सैन्य भिडन्त मङ्गलबार राति इरानले खाडी क्षेत्रस्थित अमेरिकी सैन्य बेसहरूमा क्षेप्यास्त्र प्रहार गरेपछि पुनः ब्युँतिएको हो। आक्रमणपछि विश्व बजारमा कच्चा तेलको मूल्य चार प्रतिशतभन्दा बढीले वृद्धि भएको छ।
यो सैन्य कारबाही यस्तो समयमा भएको हो जब अमेरिकी राष्ट्रपति डोनाल्ड ट्रम्प र इजरायली प्रधानमन्त्री बेन्जामिन नेतान्याहुबीच वासिङ्टनमा भेटवार्ता भएको छ। फेब्रुअरीको अन्त्यमा मध्यपूर्व युद्ध सुरु भएयता दुई नेताहरूबीच भएको यो पहिलो प्रत्यक्ष भेट हो।
ह्वाइट हाउसमा करिब डेढ घण्टा चलेको बन्दसत्र वार्तालाई अमेरिकी प्रशासनले ‘सकारात्मक र उत्पादक’ भनेको छ। भेटपछि जारी भिडियो सन्देशमा नेतान्याहुले भनेका छन्, “राष्ट्रपति ट्रम्पसँग भएको यो अहिलेसम्मकै उत्कृष्ट कुराकानीमध्ये एक हो, जसमा इरानलाई आणविक हतियार प्राप्त गर्न नदिने हाम्रो साझा लक्ष्यबारे छलफल भयो।”
यसैबीच, इरानी रिभोलुसनरी गार्ड्स (IRGC) ले रणनीतिक रूपमा महत्त्वपूर्ण मानिने होर्मुज जलडमरूमध्यमा चेतावनी बेवास्ता गरेको भन्दै तीन वटा तेल ट्याङ्करहरूलाई रोकेको र आक्रमण गरेको दाबी गरेको छ। जलमार्गमा आफ्नो ‘पूर्ण नियन्त्रण’ रहेको इरानको भनाइ छ।
होर्मुज जलडमरूमध्यको नियन्त्रण र सुरक्षित आवगमनलाई लिएर इरान र ओमानबीच वार्ता भइरहेको भए पनि इरानी सेनाले चेतावनी उल्लङ्घन गर्ने जहाजहरूलाई लक्षित गरिरहेको छ। अमेरिका र साउदीको पछिल्लो कारबाहीले खाडी क्षेत्रमा तेल आपूर्ति थप प्रभावित हुने जोखिम बढाएको छ।
