तेहरान । इरानले सामरिक रूपमा अत्यन्तै महत्त्वपूर्ण मानिने होर्मुज जलडमरूमध्य (Strait of Hormuz) को सुरक्षा र निगरानीमा थप कडाइ गरेको छ। इरानी सेनाका प्रवक्ता मोहम्मद अक्रमिनियाले शनिबार एक वक्तव्य जारी गर्दै उक्त क्षेत्रबाट हुने जहाजहरूको आवागमन अब इरानी निकायहरूको समन्वय र स्वीकृतिमा मात्र सम्भव हुने स्पष्ट पारेका छन्।
अक्रमिनियाका अनुसार होर्मुज जलडमरूमध्यको व्यवस्थापन इरानको पूर्ण अधिकार क्षेत्रभित्र पर्ने विषय हो। वर्तमान क्षेत्रीय परिस्थितिलाई दृष्टिगत गर्दै सशस्त्र बलले आवश्यक सुरक्षा उपायहरू लागू गरेको उनले बताए। यस क्षेत्रको निगरानी र सुरक्षा व्यवस्थापनका लागि इरानको इस्लामिक रिभोलुसन गार्ड कोप्र्स (IRGC) र राष्ट्रिय सेनालाई संयुक्त रूपमा परिचालन गरिएको छ।
यसैबीच, इरानका उपविदेशमन्त्री हमिद घानबारीले विभिन्न राष्ट्रहरूले आफ्ना व्यापारिक जहाजहरूको सुरक्षित मार्ग सुनिश्चित गर्न तेहरानसँग कूटनीतिक संवाद अघि बढाएको जानकारी दिएका छन्। फार्स समाचार एजेन्सीका अनुसार धेरै देशले इरानलाई आफ्ना जहाजहरूको आवागमनमा अवरोध नहुने वातावरण बनाउन अनुरोध गरेका छन्।इरानले गत फेब्रुअरी २८ देखि नै यस जलक्षेत्रमा सुरक्षा व्यवस्थालाई उच्च सतर्कतामा राखेको छ। पछिल्लो समय मध्यपूर्वमा विकसित राजनीतिक तथा सैन्य घटनाक्रमका कारण इरानले यो कदम चालेको विश्लेषण गरिएको छ।
विश्वव्यापी ऊर्जा सुरक्षाका दृष्टिकोणले होर्मुज जलडमरूमध्य विश्वकै सबैभन्दा महत्त्वपूर्ण मार्ग मानिन्छ। विश्वमा खपत हुने पेट्रोलियम पदार्थको ठूलो हिस्सा यही मार्ग भएर निर्यात हुने गर्दछ। इरानले यस मार्गमा गरेको कडाइ र जहाज आवागमनमा राखेको ‘पूर्व-स्वीकृति’ को सर्तले अन्तर्राष्ट्रिय व्यापार र ऊर्जा आपूर्तिमा पार्न सक्ने प्रभावलाई लिएर विश्व समुदायले चासोका साथ नियालिरहेको छ।
