किन्सासा । डेमोक्रेटिक रिपब्लिक अफ कङ्गो (डीआर कङ्गो) मा तीव्र गतिमा फैलिएको इबोला सङ्क्रमण इतिहासकै दोस्रो ठूलो प्रकोपका रूपमा दर्ता भएको छ। मे महिनाको मध्यदेखि सुरु भएको यस प्रकोपमा परी हालसम्म ३,५०० भन्दा बढी मानिस सङ्क्रमित भइसकेका छन् भने १,५५० भन्दा बढीको मृत्यु भइसकेको छ।
विश्व स्वास्थ्य सङ्गठन (डब्ल्यूएचओ) का अनुसार सङ्क्रमण फैलिने दर अघिल्ला प्रकोपहरूभन्दा निकै तीव्र रहेको छ। यसअघि सन् २०१८ देखि २०२० सम्म कङ्गोमा फैलिएको दुई वर्ष लामो इबोला प्रकोपलाई उछिन्दै यो सङ्क्रमण मात्र दुई महिनाभन्दा थोरै समयमा दोस्रो ठूलो रूप लिन पुगेको हो। अब यसभन्दा ठूलो प्रकोपका रूपमा सन् २०१४–२०१६ को पश्चिम अफ्रिकी इबोला महामारी मात्र रहेको छ।
स्वास्थ्य अधिकारीहरूका अनुसार यो प्रकोप इबोलाको ‘बुन्दिबुग्यो’ (Bundibugyo) नामक दुर्लभ प्रजातिका कारण फैलिएको हो। यस प्रजाति विरुद्ध पूर्ण रूपमा प्रमाणित खोप र औषधि अभाव रहेकाले सङ्क्रमण नियन्त्रणमा चुनौती थपिएको छ।
पूर्वी कङ्गोको इटुरी प्रान्तमा केन्द्रित यो सङ्क्रमण सशस्त्र द्वन्द्व, खानी क्षेत्रका कारण हुने मानिसहरूको निरन्तर आवतजावत र असुरक्षाका कारण नियन्त्रण बाहिर जाँदै गरेको छ। डब्ल्यूएचओका महानिर्देशक डा. टेड्रोस एडहानोम गेब्रेयससले नियन्त्रणका प्रयासभन्दा सङ्क्रमणको गति तीव्र रहेको भन्दै गम्भीर चिन्ता व्यक्त गरेका छन्।
