किभ । अमेरिकी राष्ट्रपति डोनाल्ड ट्रम्पले दुवै पक्षलाई संयम अपनाउन आग्रह गरेपछि रूसले पनि सोही कदम चालेमा आफ्ना प्रहारहरू रोक्न युक्रेनले सहमति जनाएको छ। युक्रेनी राष्ट्रपति भोलोदिमिर जेलेन्स्कीले सामाजिक सञ्जाल ‘एक्स’ मार्फत एक वक्तव्य जारी गर्दै महत्वपूर्ण पूर्वाधारहरूको विनाश रोक्नका लागि रूससँग सम्झौताको वातावरण बनाइदिन आफ्ना सहयोगी राष्ट्रहरूलाई प्रस्ताव गरेका छन्।
“यदि हाम्रा सहयोगीहरूले रूसले हाम्रा बिजुली प्रणाली, अन्य उर्जा संरचना, संवेदनशील पूर्वाधार र खाद्य आपूर्ति मार्गहरूमा प्रहार नगर्ने कुरा सुनिश्चित गर्न तयार हुन्छन् भने, हामी पनि हाम्रा तर्फबाट हुने प्रहार रोक्न पूर्ण रूपमा तयार छौँ,” जेलेन्स्कीले भनेका छन्। उनले युद्ध अन्त्य हुनुपर्ने र उर्जा पूर्वाधारमाथिको आक्रमण रोक्नु नै शान्तितर्फको पहिलो कदम हुन सक्ने स्पष्ट पारेका छन्।
जेलेन्स्कीको यो भनाइ ट्रम्पले रूस र युक्रेन दुवै उर्जा संरचनामा प्रहार नगर्न सहमत भएको दाबी गरेपछि आएको हो। ट्रम्पले ‘ट्रुथ सोसल’ मा लेख्दै युक्रेन र रूस दुवै एकअर्काका उर्जा केन्द्रहरूमा प्रहार नगर्न सहमत भएको जनाएका थिए। क्रेमलिनका प्रवक्ता दिमित्री पेस्कोभले पनि युक्रेनलाई नागरिक आर्थिक पूर्वाधारमा आक्रमण रोक्न दिइने जुनसुकै दबाब वा आह्वानलाई रूसले स्वागत गर्ने बताएका छन्।
यद्यपि, शान्ति पहलका प्रयासहरू भइरहँदा पनि दुवै पक्षबिच सैन्य कारबाही भने रोकिएको छैन। रूसी रक्षा मन्त्रालयका अनुसार पश्चिमी युक्रेनका रेलवे पूर्वाधार र रसद भण्डारण केन्द्रहरूमा प्रहार जारी राखिएको छ। अर्कोतर्फ, युक्रेनी सेनाले रूसको नोभोरोसिस्क सहरमा रहेको नौसैनिक अड्डा, तेल लोडिङ टर्मिनल र युद्धपोतहरूमाथि सफल प्रहार गरेको जेलेन्स्कीले दाबी गरेका छन्। युद्धका कारण इन्धनको घरेलु बजार अस्थिर बनेपछि रूसले ग्यासोलिन, डिजेल र समुद्री इन्धनको निर्यातमा अस्थायी प्रतिबन्ध लगाउनुपर्ने स्थिति आएको छ।
