पाकिस्तान। पाकिस्तानको काराकोरम पर्वतश्रृङ्खलामा रहेको विश्वको १२ औँ अग्लो चुचुरो ब्रोड पिक (८,०४७ मिटर) मा गएको भीषण हिमपहिरोमा परी विश्वकीर्तिमानी नेपाली आरोही निर्मल पुर्जा (‘निर्म्स दाई’) सहित १० जना आरोही बेपत्ता भएका छन्।
अल्पाइन क्लब अफ पाकिस्तान (ACP) का अनुसार बिहीबार दिउँसो क्याम्प २ बाट क्याम्प ३ तर्फ (करिब ६,६०० मिटरको उचाइ) आरोहण गर्ने क्रममा आरोही टोली हिमपहिरोको चपेटामा परेको हो।
निर्मल पुर्जाको नेतृत्वमा रहेको उक्त टोलीमा पुर्जासहित ५ जना नेपाली आरोही, पाकिस्तानी गाईड, तथा अमेरिका, चीन र ओमानका अन्तर्राष्ट्रिय आरोहीहरू समावेश रहेको जनाइएको छ। हिमपहिरोपछि उक्त टोलीसँग आधार शिविर (बेस क्याम्प) र अन्य निकायको सम्पर्क पूर्ण रूपमा विच्छेद भएको छ।
घटना सार्वजनिक भएलगत्तै पाकिस्तान सरकार, अल्पाइन क्लब र सम्बन्धित एजेन्सीहरूको समन्वयमा खोजी तथा उद्धार कार्य सुरु गरिएको छ। मौसम अनुकूल भएमा पाकिस्तान वायुसेनाको हेलिकप्टरमार्फत उद्धार टोली परिचालन गर्ने तयारी भइरहेको छ। आधार शिविरबाट समेत केही उद्धारकर्ताहरू घटनास्थलतर्फ प्रस्थान गरिसकेका छन्।
यसैबीच, निर्मल पुर्जाको साथमा रहेको ‘ट्र्याकिङ डिभाइस’ (जीपीएस) मा केही गतिविधि र लोकेसन परिवर्तन देखिएको उनका व्यावसायिक साझेदार मिङ्मा ग्याबु शेर्पाले जानकारी दिएका छन्। डिभाइसमा लोकेसन सरेको देखिएकाले आरोहीहरू सुरक्षित हुन सक्ने आशा जगाएको छ।
पाकिस्तानका अधिकारीहरू र आरोहण क्षेत्रका सङ्घसंस्थाले घटनाप्रति गहिरो चिन्ता व्यक्त गर्दै टोलीका सबै सदस्यको सकुशल उद्धारको कामना गरेका छन्।
