चीनको ‘शेन्झोउ–२१’ अन्तरिक्ष अभियानमा सहभागी तीन अन्तरिक्षयात्री झाङ लु, वु फेई र झाङ होङझाङ २१० दिनको अन्तरिक्ष बसाइ पूरा गरी शनिबार बेइजिङ आइपुगेका छन्। शुक्रबार साँझ पृथ्वीमा सुरक्षित अवतरण गरेको यो टोलीको स्वास्थ्य अवस्था सामान्य रहेको चीनको मानवयुक्त अन्तरिक्ष कार्यक्रमसम्बन्धी निकायले जनाएको छ। सो निकायले शेन्झोउ–२१ अन्तरिक्ष अभियान पूर्ण रूपमा सफल भएको पुष्टि गर्दै यसलाई देशको अन्तरिक्ष अनुसन्धान र प्रविधि विकासका क्षेत्रमा एउटा महत्त्वपूर्ण उपलब्धिको रूपमा व्याख्या गरेको छ। अभियानका क्रममा टोलीले अन्तरिक्ष केन्द्रमा रहेर विभिन्न वैज्ञानिक अनुसन्धान, प्राविधिक परीक्षण तथा केन्द्रको नियमित सञ्चालनसँग सम्बन्धित महत्त्वपूर्ण जिम्मेवारीहरू पूरा गरेको थियो।
पृथ्वीमा फर्किएपछि अन्तरिक्षयात्रीहरूलाई केही समयका लागि चिकित्सकीय निगरानी तथा क्वारेन्टिनमा राखिएको छ। यस अवधिमा उनीहरूको विस्तृत स्वास्थ्य परीक्षण, शारीरिक अवस्थाको मूल्याङ्कन तथा आवश्यक पुनःस्थापना प्रक्रिया सञ्चालन गरिनुका साथै लामो समय अन्तरिक्षमा बिताउँदा शरीरमा पर्न सक्ने प्रभावहरूको समेत अध्ययन गरिने बताइएको छ। स्वास्थ्य परीक्षण र विश्रामको चरण पूरा भएपछि अन्तरिक्षयात्रीहरूले बेइजिङमा आयोजना हुने पत्रकार सम्मेलनमार्फत आफ्ना अनुभव र अभियानका उपलब्धिबारे जानकारी दिने तय भएको छ। यस अभियानको सफलताले चीनको मानवयुक्त अन्तरिक्ष कार्यक्रमलाई थप उचाइ दिएको र भविष्यमा हुने उन्नत अन्तरिक्ष मिसनका लागि बलियो आधार तयार पारेको विश्लेषण गरिएको छ।
