काठमाडौँ । परराष्ट्र मन्त्री शिशिर खनालले प्रधानमन्त्री वालेन्द्र शाह (बालेन)को भारत भ्रमणबारे अन्तिम निर्णय नभइसकेको बताएका छन्।
उनले भारतीय पक्षबाट निम्तो आएको जानकारी दिँदै भ्रमणको मिति र औपचारिकता भने टुंगो नलागेको स्पष्ट पारेका छन्।
मोरिसस भ्रमणबाट फर्किएपछि त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै खनालले भारतीय प्रधानमन्त्री नरेन्द्र मोदीको बधाई सन्देशसँगै भ्रमणको निम्तो प्राप्त भएको बताएका छन्।
उनका अनुसार नेपाल र भारतबीच ४० भन्दा बढी द्विपक्षीय संयन्त्र छन्, जसमा केही सक्रिय र केही निष्क्रिय अवस्थामा रहेका छन्। ती संयन्त्रलाई पुनः सक्रिय बनाउने र आवश्यक प्राविधिक तयारी पूरा गर्ने प्रक्रिया अघि बढाइने उल्लेख गरिएको छ।
यसले उच्चस्तरीय भ्रमणअघि प्राविधिक तहमा समन्वय र तयारीलाई प्राथमिकता दिइने संकेत गरेको छ।
परराष्ट्र मन्त्री खनाल चैत २७ गते नवौँ भारतीय महासागर सम्मेलनमा भाग लिन मोरिसस गएका थिए। सो क्रममा भारतका विदेश मन्त्री एस जयशंकरसँग साइडलाइन भेटवार्ता भएको र द्विपक्षीय विषयमा प्रारम्भिक छलफल भएको सन्दर्भ पनि सार्वजनिक गरिएको छ।
