काठमाडौँ । सरकारले मध्यपूर्वका विभिन्न मुलुकका विमानस्थलमा ट्रान्जिटमा रहेर अलपत्र परेका नेपाली नागरिकलाई तत्काल फिर्ता ल्याउन वा गन्तव्यतर्फ पठाउन नसकिने अवस्था देखिएको भन्दै उनीहरूलाई सोही स्थानमा आवश्यक सुरक्षा प्रबन्ध मिलाउने निर्णय गरेको छ।
आइतबार प्रधानमन्त्री निवास बालुवाटारमा बसेको मन्त्रिपरिषद् बैठकले क्षेत्रीय तनावका कारण सम्बन्धित देशका विमानस्थलहरू बन्द रहेको अवस्थालाई मूल्यांकन गर्दै यस्तो निष्कर्ष निकालेको हो।
बैठकपछि जानकारी दिँदै एक मन्त्रीले हालको परिस्थितिमा यात्रुहरूको आवागमन सम्भव नभएकाले उनीहरू रहेको स्थानमै समन्वयमार्फत सुरक्षा सुनिश्चित गरिने बताएका छन्।
बैठकमा विभिन्न देशका विमानस्थलमा ट्रान्जिटमा परेका नेपाली नागरिकले भोगिरहेका असुविधाका विषयमा समेत छलफल भएको जनाइएको छ।
मध्यपूर्वमा विकसित सुरक्षा अवस्थाको नेपालमाथि परेको प्रभाव र त्यस सन्दर्भमा सरकारले अपनाउने कूटनीतिक तथा प्रशासनिक प्रतिक्रियाबारे पनि मन्त्रिपरिषद् स्तरमा समीक्षा गरिएको परराष्ट्र मन्त्रालयले जनाएको छ।
