वासिङ्टन। अमेरिका र क्यानडाबीच चर्किएको व्यापार विवाद थप गहिरिएको छ। अमेरिकी राष्ट्रपति डोनाल्ड ट्रम्प प्रशासनले क्यानडाबाट आयात हुने केही डेरी उत्पादन, मदिराजन्य पेय पदार्थ र मोटरसाइकलमा प्रतिबन्ध लगाउने निर्णय गरेको छ। नयाँ व्यवस्था सेप्टेम्बर २९ देखि लागू हुनेछ।
अमेरिकी ह्वाइट हाउसका अनुसार क्यानडाले अमेरिकी डेरी, मदिरा र मोटरसम्बन्धी उत्पादनमा विभेदपूर्ण व्यापार नीति अपनाएको दाबी गर्दै नयाँ प्रतिबन्ध लगाइएको हो। प्रतिबन्धअन्तर्गत पर्ने वस्तुको विस्तृत सूची अमेरिकी प्रशासनले जारी गरेको छ।
यो निर्णय क्यानडाले करिब २० अर्ब अमेरिकी डलर बराबरका अमेरिकी वस्तुमा प्रतिशोधात्मक शुल्क लागू गरेपछि आएको हो। क्यानडाको कदम यसअघि अमेरिकाले क्यानडाली उत्पादनमा लगाएको उच्च शुल्कको जवाफमा आएको थियो।
अमेरिकाले क्यानडाली उत्पादनलाई संघीय सरकारका ठूला र दीर्घकालीन खरिद सम्झौताबाट समेत बाहिर राख्ने नीति अघि सारेको छ। ट्रम्प प्रशासनले क्यानडाले अमेरिकी उत्पादनलाई ‘निष्पक्ष र समान’ बजार पहुँच नदिएको आरोप लगाउँदै व्यापारिक दबाब बढाएको छ।
क्यानडाका प्रधानमन्त्री मार्क कार्नीले भने अमेरिकी निर्भरता घटाउँदै अन्य अन्तर्राष्ट्रिय बजारसँग व्यापार विस्तार गर्ने रणनीति अघि सारेका छन्। क्यानडाको कुल निर्यातको ठूलो हिस्सा अमेरिकातर्फ जाने भएकाले दुई देशबीचको व्यापार तनावले उत्तर अमेरिकी आपूर्ति शृंखला र उद्योगमा समेत असर पार्न सक्ने विश्लेषण गरिएको छ।
अमेरिका र क्यानडाबीचको व्यापार विवाद पछिल्लो समय शुल्क वृद्धिबाट आयात प्रतिबन्धसम्म पुगेको छ। वार्ता पुनः सुरु हुने सम्भावना रहे पनि तत्काल समाधानको स्पष्ट संकेत देखिएको छैन।
