किन्सासा । डेमोक्र्याटिक रिपब्लिक अफ द काङ्गो (DRC) र अन्तर्राष्ट्रिय साझेदार संस्थाहरूले देशमा तीव्र रूपमा फैलिरहेको इबोला महामारी नियन्त्रणका लागि १.३ अर्ब अमेरिकी डलर लागत अनुमान गरिएको १८० दिने नयाँ बहुक्षेत्रीय कार्ययोजना सार्वजनिक गरेका छन्। विश्व स्वास्थ्य सङ्गठन (WHO) र अफ्रिका सेन्टर फर डिजिज कन्ट्रोल एन्ड प्रिभेन्सनको सहयोगमा तयार पारिएको यो कार्ययोजनाले आगामी छ महिनाका लागि महामारीविरुद्धको मार्गचित्रका रूपमा काम गर्नेछ।
अफ्रिकाका लागि डब्लुएचओको क्षेत्रीय कार्यालयका अनुसार ‘बुन्डिबुग्यो’ प्रजातिको भाइरसका कारण फैलिएको यो महामारीबाट सेप्टेम्बर २ सम्म ६,३४२ जना सङ्क्रमित भएका छन् भने ३,०७२ जनाको मृत्यु भइसकेको छ। यो सङ्क्रमण हालसम्म ६ वटा प्रान्तका ६० वटा स्वास्थ्य क्षेत्रहरूमा फैलिसकेको छ।
स्वास्थ्य अधिकारीहरूका अनुसार धेरैजसो बिरामीहरूको पहिचान नभई र स्वास्थ्य संस्थासम्म नपुगी समुदायस्तरमै मृत्यु हुनु मुख्य चिन्ताको विषय बनेको छ। गत मे महिनामा औपचारिक रूपमा घोषणा गरिएको यो प्रकोप काङ्गोको इतिहासमै अहिलेसम्मकै सबैभन्दा तीव्र गतिमा फैलिरहेको इबोला महामारी बनेको छ। संयुक्त राष्ट्रसङ्घ र अफ्रिका सिडीसीले काङ्गो सरकारलाई महामारी नियन्त्रणका लागि स्रोतसाधन जुटाउन र समुदायस्तरमा पहुँच बढाउन पूर्ण सहयोग गर्ने प्रतिबद्धता व्यक्त गरेका छन्।
