बेइजिङ । अमेरिकाले इरानी अर्थतन्त्रलाई एक्ल्याउने अभियानमा बेइजिङसहित अन्य देशहरूलाई सहभागी हुन आग्रह गरेपछि चीनले “प्रतिबन्ध र दबाब” बाट मध्यपूर्वको द्वन्द्व समाधान नहुने स्पष्ट पारेको छ।
इरानसँग युद्ध सुरु भएको करिब छ महिना पुग्नै लाग्दा अमेरिकाले इरानी शासनलाई “ध्वस्त पार्ने” चेतावनी दिएको छ भने तेहरानले यसलाई “आर्थिक आतङ्कवाद” भन्दै असफल हुने दाबी गरेको छ।
अमेरिकी राष्ट्रपति डोनाल्ड ट्रम्पका चेतावनीहरूबारे सोधिएको प्रश्नमा चिनियाँ परराष्ट्र मन्त्रालयका प्रवक्ता लिन जियानले शुक्रबार भने, “प्रतिबन्ध र दबाबले मुद्दा समाधान गर्न मद्दत गर्दैन।” उनले सबै सम्बन्धित पक्षहरूलाई राजनीतिक र कूटनीतिक माध्यमबाट समस्या समाधान गर्न र जिम्मेवार कदम चाल्न आग्रह गरे।
यसैबीच, अमेरिकी अर्थमन्त्री स्कट बेसेन्टले तेहरानमाथि आर्थिक दबाब बढाउने ट्रम्पको नीतिको बचाउ गरेका छन्। बेइजिङलाई यो अभियानमा सामेल गराउन अमेरिकाले दबाब दिन्छ कि दिँदैन भन्ने प्रश्नमा बेसेन्टले चीनलाई यो कार्यक्रममा सहभागी हुन आह्वान गरेका छन्।
बेसेन्टको टिप्पणीबारे प्रतिक्रिया दिँदै प्रवक्ता लिनले चीनको पुरानो अडान दोहोर्याए। उनले भने, “अन्तर्राष्ट्रिय कानुनमा कुनै आधार नभएका र संयुक्त राष्ट्रसङ्घ सुरक्षा परिषद्ले स्वीकृत नगरेका गैरकानुनी एकपक्षीय प्रतिबन्धहरूको चीन विरोध गर्दछ।”
